Pehli Kavita

 

Rona chahega magar phir bhi nahi ro payega
Paas insan ke itne bhi nahi ansu bachenge

Jalane wali hai zamin aag, se angaro me
Khone wali hai sahar aah or chitkaro me
Sajne wale hain dar ab dekho kabarstano ke
Murdo se pat jayenge kal aangan shamshano ke

Bas har taraf virana hi ayega nazar
Doli chadegi vedna or dulahan banegi kahar
Har disha dikhegi jalti or dhudle se pahar
Ek hi si kali Ratein or syahe-syahe sehar

Yam dhara par nirityanganay maut ki nachayega
Gid bhoj roz khayenge virana jashan manayega
Krindno ke geet par , vilap ke aalap par
Aasuon se paon dhokar bas yamdut muskurayega

Jang phir se chird gai ab ke jahan mai agar
To vajud aadami ka sehejna na aasan hoga
Shakal jab kudarat hi ki badshakal or ho jayegi
To kaya khak Iraq ,Russ or kya Iran hoga

Jab sagar ki Lehrein khofnak lengi karvaten dekhna
zalzalo par aachank jab javani ka nasha chayega
Tab dekhana ye zamin lasho se yahan pat jayegi
Ki janaza apna khud murda lekar jayega

Dekh kar aisa nazare kudarat bhi dahal jayegi
Jab aadami royega or badahvas bache chikhenge
Kahi apahij,kahi zakhami ,kahi jale-kate huye
Apane hi badan ke hise darkhato pe latake dikhenge

Yaad rakho ye zamana aaj  nahi talvaro ka
Zakham jiske kuch dino mai koi maraham bhardega
Ghav jiske bharna namumkin hai kai sadion tak
Zakham aisa bas ek hi chota sa bam kar dega

E- khuda! hai iltija tujhse meri shyam ''ou"sehar
Rok de kaise bhi ye jang ka khofnak tufan
Varna ye jhutha gurur,nicha dikhane ki hor
Kar degi zindagi se aasman "ou" zamin viran

Agar takara gaya gurur jo galti se bhi ekbar
To mudton na ho payenge roshan zamin pe chirag
Jahan par dikhti hai aaj nanhe paon pe zindagi
Kal vahi par dhundni hogi hume jeevan ke rakh .